Kaamkettin - A Short story in Sourashtram by M.S.Ramani - part 7.

Kaamkettin  ꢒꢵꢪ꣄ꢒꢾꢡ꣄ꢡꢶꢥ꣄ By M.S.Ramani. (7)

ꢣꢾꢒ꣄ꢒꢶꢥꢶ (꣔)

(ꢦꢵꢡ꣄ꢬꢵꢥ꣄, ꢣꢵꢱ꣄, ꢃꢰꢵ, ꢆꢰꢵ)

ꢆꢰꢵ: ꢃꢰꢵ,  ꢃꢰꢵ !

ꢃꢰꢵ: ꢒꢵꢫ꣄ ꢨꢾꢫ꣄ … ꢍꢜ꣄ ꢕꣁꢪ꣄ꢪꣂꢱ꣄  ꢯꢿꢡ꣄ꢡꢾ !

ꢆꢰꢵ: ꢡꢿꢜ꣄ ꢒꢵꢫ꣄ ꢒꢾꢬꢬꢶꢡ꣄ꢡꢾ ? ꢍꢜꢵꢮꢶ …

ꢃꢰꢵ: ꢣꢣꣁ ꢙꣂꢳ꣄ ꢨꣁꢜ꣄ꢜꣁ  ꢪꢒꢬꢶꢡ꣄ꢡꢾ …ꢔꢸꢛ꣄ꢙꢡ꣄ꢡꢒ꣄ !

ꢆꢰꢵ: ꢪꣁꢬ꣄ ꢙꣂꢳ꣄ ꢪꢫꢾꢡ꣄ ꢪꢷ ꢓꢞ꣄ꢞꢿꢥꢵ  ? ꢡꢾꢖ꣄ꢒꣁ ꢦꢱ꣄ꢒꢜꢹꢱ꣄ ꢗꢸꢜ꣄ꢜꢸ ꢧꢶꢭ꣄ꢭꢿꢡ꣄ ꢬꢴꢵꢬꢶꢱ꣄ꢥꢵ ?

ꢣꢵꢱ꣄:  ꢪꢷꢱ꣄ ꢨꣁꢮꢾꢡ꣄ꢡꢾ..  ꢕꣁꢪ꣄ꢪꣁ ꢭꣁꢜꢸꢥꣁ ꢪꢾꢥ꣄ꢡꢶ ..

ꢆꢰꢵ: ꢂꢮ꣄ꢡꣁ ꢂꢮ꣄ꢡꣁ ꢡꢸꢪꢶ ꢒꢾꢬꢬꢶꢫꣁ ꢬꢸꢮ꣄ꢮꣁ ꢪꢾꢳ꣄ꢳꣁ ꢱꢾꢬ꣄ꢒꣁ ꢥꢴꢷ ! ꢂꢱ꣄ꢒꢶꢫꢾꢒꣁ ꢡꢾꢒꢒꢹꢱ꣄ꢥꢵ ꢨꣁꢮꢥ꣄ ꢥꢶꢒꢶꢳ꣄ꢳꢶꢬꢵꢱꢶ..

ꢣꢵꢱ꣄: ꢪꢾꢫ꣄, ꢡꢾꢒꣁ ꢨꣁꢮ꣄ꢥꢵꢡ꣄ꢡꣁ ꢒꣁꢖ꣄ꢒꣁ ꢨꣁꢮꢫꢷ? ꢡꢹꢡꢶ ꢒꢵꢪ꣄ ꢒꢾꢥ꣄ꢥꢵꢡ꣄ꢡꢾ  ꢪꢴꢬꢙꢶꢥ꣄ꢥꢵ.. ꢃꢰꢵ !ꢡꣁꢬꢾ ꢲꢡꢬꣁ ꢒꢵꢦ꣄ꢦꢶ ꢒꢾꢭ꣄ꢭꢶ ꢂꢥꢶ ꢣꢿ..

ꢆꢰꢵ: ꢙꢷ ꢨꣁꢜ꣄ꢜꣁ ꢔꢸꢛ꣄ꢙꢶꢭꢶ ꢃꢮ꣄ꢮꢵ ..ꢪꢶ ꢒꢵꢦ꣄ꢦꢶ ꢒꢾꢬꢶ ꢣꢾꢮꢸꢱꢸ..

ꢣꢵꢱ꣄: ꢡꢹ ꢒꢵꢦꢶ ꢒꢾꢬꢡ꣄ꢡꢒꢵ? ꢡꣁꢒꣁꢡꢷ ꢦꢱ꣄ꢡꢮꢸꢥ꣄ ꢗꢾꢮ꣄ꢣꢡ꣄ꢡꢾ ꢒꢵꢪꢸꢥ꣄ ꢬꢴꢵꢫꢷ ..

ꢆꢰꢵ: ꢪꣁꢬ꣄ ꢲꢵꢭ꣄ ꢒꣁꢥ꣄ꢥꢶ ꢪꢸꢱꢬꢥꢶ  .. ꢪꢸꢭ꣄ꢭꢵꢪ꣄ ꢡꢷ ꢬꣁꢮꢪ꣄ꢒꣁ ꢗꢾꢮ꣄ꢣꢫꢾꢱ꣄ … ꢂꢡ꣄ꢡꣁ   .. ꢌꢒ ꢱꢾꢥ꣄ꢡꢵ ꢣꣁꢱ꣄ꢒꣁ ꢣꢸꢮ꣄ꢥꣂꢱ꣄ ꢪꢴꣁꢜ꣄ꢜꢒ ꢯꢿ ..

ꢃꢰꢵ: ꢣꢣꢵ ..ꢏꢠ꣄ꢜꢾ  ꢮꢷꢱꢸ ꢬꢸꢦꢵꢫ꣄ ꢲꢥ꣄ꢥꢮ꣄ ꢦꢫꢾ ꢲꣂꢱꢸ ..

ꢆꢰꢵ:  ꢥꢶꢒꢶꢳ꣄ꢳꢶꢱ꣄ꢱꢷ ! ꢲꢥ꣄ꢥꢮ꣄ꢪꢹꢱ꣄  ꢕꣁꢬꢪ꣄ꢒ ꢬꢴꢥꣁ…

ꢣꢵꢱ꣄:  ꢪꢴꢞꣁ ꢪꢸꢱꢸꢥꢵꢡ꣄ꢡꣁ ꢪꢸꢭ꣄ꢭꣂꢱ꣄ ꢱꢪ꣄ꢨꢸꢳꣁ ꢲꢥ꣄ꢥꢮ꣄ ꢓꢳ꣄ꢳꢶ ꢱꢡ꣄ꢡꢬꢷꢱ꣄ꢥꢵ .. ꢡꢿꢭꢵ .. ꢮꢷꢱꢸ ꢬꢸꢦꢵꢫꢷꢱ꣄ ꢡꣁꢒꣁ ꢣꢾꢥꣁ ꢯꢿ.

ꢃꢰꢵ: ꢱꣁꢥ꣄ꢣꣁ ꢬꢴꢷ ꢪꣀꢥꢵ ꢣꢣꢵ .. (ꢲꢥ꣄ꢥꢮ꣄ ꢓꢳ꣄ꢳꢶ) ꢒꢵꢫ꣄ ꢒꢾꢬꢾꢡꢶ ꢡꢸꢥ꣄ꢣꢾ ꢪꣁꢥ꣄ꢥꢸ ꢆꢭꢵꢱ꣄ ꢲꣁꢫꢾ ꢪꣁꢥ꣄ꢥꢹꢱ꣄.
ꢆꢰꢵ: ꢧꢸꢙ꣄ꢙꢵꢮꢵ ꢌꢖ꣄ꢔꢸꢜ꣄ ꢂꢮ꣄ꢞꢾ .. ꢄꢱꢵ ꢌꢗ꣄ꢗꢶꢥꢶ ꢮꢡ꣄ꢡꣁ ꢒꢾꢬꢶ ꢲꢥ꣄ꢥꢮ꣄ ꢓꢳ꣄ꢙꢵꢡ꣄ꢡꢒ꣄ ꢗꣁꢒ꣄ꢒꢜ꣄ ꢱꢶꢒ꣄ꢒꢶ ꢢꣁꢮ꣄ꢭ꣄ꢬꢶꢱ꣄ ꣎

ꢃꢰꢵ: ꢱꢮꣁ  ꢣꢣꢵ .. ꢄꢱꣂꢱ꣄ ꢓꣁꢨ꣄ꢨꣁ ꢱꢶꢫꢾꢡꢶ ꢔꢵꢳ꣄ꢞꢱꢸꢥ꣄ ꣎

ꢣꢵꢱ꣄: ꢡꢹ ꢙꢷ ꢒꢵꢪ꣄ ꢱꢵ ꢂꢪ꣄ꢨꣂ …(ꢃꢰꢵ ꢙꢵꢱ꣄) ꢲꢥ꣄ꢥꢮ꣄ ꢣꢿꢡ꣄ꢡꢫꢾ ꢣꢿꢛ꣄ꢙꢵꢱꢸꢥꢸ .. ꢡꢾꢪꣁ ꢒꢒꣁ ꢄꢱꣁ ꢮꢡ꣄ꢡꢵꢥ꣄ ꢂꢱ꣄ꢒꢶ ꢒꢾꢬ꣄ꢥꣁ?

ꢆꢰꢵ: ꢪꢾꢫ꣄ ꢪꢒꢡ꣄ꢡꢾꢮꢿꢳꣁ ꢂꢱ꣄ꢒꢶ ꢣꢶꢭꢿꢡ꣄ ꢬꢴꢮꣂ.. ꢡꢾꢥꣂꢱ꣄ ꢡꢸꢖ꣄ꢒꣁ ꢂꢱ꣄ꢒꢶ !

                               ꢂꢖ꣄ꢔꢸꢥ꣄ ꢂꢮꢫ꣄ (to be continued)