Kaamkettin - காம்கெத்தின் - ஸௌராஷ்ட்ர சிறு கதை - By M.S.Ramani.

Kaamkettin  ꢒꢵꢪ꣄ꢒꢾꢡ꣄ꢡꢶꢥ꣄ By M.S.Ramani. (8)

ꢣꢵꢱ꣄: ꢍ ꢱꢵ, ꢌꢭ꣄ꢡꢾ ꢮꢡ꣄ꢡꣁ ꢂꢱ꣄ꢒꢶ ꢒꢾꢬꢸꢖ꣄ꢔꣁ..  ꢡꢹ ꢲꢮ꣄ꢜꢬꢾ ꢱꣁꢒꢥ꣄ ꢂꢱ꣄ꢒꢶ ꢒꣁꢥ꣄ꢥꢶ ꢥꢴꢷ:  ꢡꢹ ꢨꣁꢭ꣄ꢫꢮꢾ ꢒꢵꢪ꣄ꢒꢾꢡ꣄ꢡꢶꢥꢹꢱ꣄ꢥꢵ ! ꢡꢹꢱ꣄ ꢄꢱꣁ ꢪꢾꢥꢬꢶꢱ꣄ꢥꢵ ..  ꢡꣁꢒꣁ ꢪꣁꢥ꣄ꢥꢹꢱ꣄ ꢱꢾꢬ꣄ꢒ꣄ꢒꣁ ꢥꢴꢷ. ꢕꣁꢪ꣄ꢪꢵꢒ꣄ꢒꢵꢪꢸꢥ꣄  ꢒꢾꢬꢡ꣄ꢡꢒꢹꢱ꣄ꢥꢵ ꢒꢵꢪ꣄ꢒꢾꢡ꣄ꢡꢶꢥꢸꢒ꣄ ꢢꣁꢮꢶꢡ꣄ꢡꢾ … ꢡꢾꢥꣁꢒꢥ꣄ ꢱꣁꢪ꣄ꢪꢬ꣄ ꢦꣁꢞꢶ ꢂꢱ꣄ꢒꢶ ꢒꢾꢬꢥ꣄ ꢂꢮꢾꢡ꣄ ꢡꢹ ꢒꢒꣁ ꢂꢞ꣄ꢞꢪ꣄ ꢦꣁꢞꢬꢵꢫꢷ?

ꢆꢰꢵ: ꢪꣁꢒꣁ ꢣꣁꢱ꣄ꢒꣁ ꢗꢸꢜ꣄ꢜꢸ ꢧꢶꢬꢾ ꢱꣁꢒꢥ꣄ ꢭꢒꢬꢾꢱꢶ ꣎ ꢒꣂ ꢱꢾ ꢬꢿꢞꢶꢫꣂ? ꢔꢷꢡ꣄ ꢎꢒꢾꢡ꣄ ꢬꣁꢮ꣄ꢮꣁ ꢗꣁꢒ꣄ꢒꢜ꣄ ꢭꢔꢫ꣄ ..

ꢣꢵꢱ꣄: ꢬꢿꢞꢶꢫꣂ ꢒꢾꢖ꣄ꢒꢾ? ꢒꢵꢪ꣄ꢒꢾꢡ꣄ꢡꢶꢥ꣄ ꢪꢶꢖ꣄ꢔꢶꢡꢶꢒꢶ ~

ꢆꢰꢵ: ꢒꢵꢫ꣄ ꢱꢖ꣄ꢔꢬꢵꢡ꣄ꢡꢾ?

ꢣꢵꢱ꣄: ꢮꢶꢒ꣄ꢒꢶꢡꢶꢫꣁ .. ꢒꢵꢪ꣄ꢒꢾꢡ꣄ꢡꢶꢥꢸꢒ꣄ ꢣꢶꢫꢾ ꢱꢪ꣄ꢨꢸꢳꣁ ꢥꢶꢮ꣄ꢬꢸꢥꢫ꣄ꢥꢵ꣎  ꢪꣁꢒꣁ ꢱꢪ꣄ꢨꢸꢳꣁ ꢱꢵꢡ꣄ ꢱꣂꢬꢸꢮꢵꢫ꣄.  ꢪꢸꢭ꣄ꢭꣁ ꢓꢞ꣄ꢬꢾꢫꢾꢒꢾ ꢏꢠ꣄ꢜꢾ ꢱꣂ ꢩꢶꢳ꣄ꢳꢶ ꢣꢿꢥꢸ. . ꢡꣁꢒꣁ ꢲꣁꢬꢵꢜ꣄ ꢒꢾꢭ꣄ꢭꢡ꣄ꢡꢒ꣄ ꢓꢞꢾ  ꢬꢷꢠꢸꢒꢸ, ꢪꢴꢞꢵꢒ꣄ ꢣꢷ ꢱꣂ ꢬꢸꢮꢵꢫ꣄ ꢣꢷ ꢲꣁꢥꣁ..ꢣꢹꢡꢸ ꢤꢾꢫ꣄ ꢪꢸꢒ꣄ꢫꢪ꣄ ꢦꢫ ꢯꢿꢡ꣄ꢡꢾꢫꢾ ꢣꢿꢜ꣄ ꢱꣂ ꢬꢸꢮꢵꢫ꣄ ꢲꣂꢬꢱꢶ. . ꢂꢖ꣄ꢔꢸꢥ꣄ ꢡꢥ꣄ꢣꢸ ꢒꣀꢭꣁ ꢒꢾꢱꢸꢬ꣄ ꢪꢾꢥꢶꢮꢿꢱꢸꢥꢸ .. ꢧꢸꢬ꣄ꢥꢵꢡ꣄ꢡꢾꢒꣁ  …ꢡꢹ ꢂꢖ꣄ꢔꢶꢞꢶꢥꢸꢪ꣄ ꢮꢶꢒ꣄ꢒꢬꢾ  ꢡꢶꢒ꣄ꢒꢹ ꢦꢱ꣄ꢡꢮꢸꢥ꣄  ꢓꢞꢶ ꢡꣀꢬꢶꢱꢶ.. ꢌꢭ꣄ꢡꢾ ꢮꢿꢱꢸꢥꢹꢱ꣄ ꢣꣁꢱ꣄ꢒꣁ ꢲꣁꢭ꣄ꢭꢾ ꢙꢿꢞꢬꢿꢱꢶ… ꢒꢵꢪ꣄ꢒꢾꢡ꣄ꢡꢶꢥꢸꢒ꣄ ꢢꢷꢥ꣄ ꢱꣂ ꢬꢸꢮꢵꢫ꣄ ꢱꢪ꣄ꢨꢸꢳꣁ  ꢒꣂꢥꢒ꣄ ꢣꢿꢫ꣄?  ꢱꢶꢫꢾꢱꢷ. . ꢬꢿꢞꢶꢫꣂ ꢮꢶꢒ꣄ꢒꢶꢡ꣄ꢡꢶꢫꣁ ꣎

ꢣꢾꢒ꣄ꢒꢶꢥꢶ - ꣕

(ꢦꢵꢡ꣄ꢬꢵꢥ꣄ ꢣꢵꢱ꣄, ꢆꢰꢵ)

ꢆꢰꢵ:  ꢒꢵꢫ꣄  ꢲꢸꢜꣁ .. ꢕꢾꢠ꣄ꢜꣁ ꢱꣂꢫꢾ …ꢤꢾꢬꣁ ꢒꢵꢦ꣄ꢦꢶ ..

ꢣꢵꢱ꣄: ꢒꣂꢥ꣄ꢫꢾ ! ꢲꢶꢥ꣄ꢣꣁ ꢡꢹ ꢄꢒ꣄ꢒꢾ ꢱꣁꢳꢨꢵꢬ꣄ ꢲꢸꢜꢶ ꢒꢵꢦ꣄ꢦꢶ ꢒꢾꢭ꣄ꢭꢶ ꢂꢥꢶ ꢲꢸꢜꢜꢬꢶꢡ꣄ꢡꢾ?

ꢆꢰꢵ: ꢲꢵꢫ꣄.. ꢂꢡ꣄ꢡꢾꢖ꣄ꢔꢸꢜ꣄ ꢌꢭ꣄ꢡꢾ ꢒꢵꢪꢸꢥ꣄ ꢂꢱ꣄ꢒꢶ ꢪꢷꢱ꣄ꢒꢾꢬꢸ꣎ ꢍ ꢎꢒꢵꢱ꣄ꢱꢷ .. ꢱꢾꢙ꣄ꢙꢾ ꢕꣁꢪ꣄ꢪꣁ ꢨꢾꢫ꣄ …ꢂꢱ꣄ꢦꢡ꣄ꢡꢶꢬꢶꢪ꣄ ꢯꢿꢫ꣄ꢥꢵ ..ꢲꢿꢪ꣄ꢪꢸ ꢣꢸꢮ꣄ꢥꣁ ꢪꢾꢥ꣄ꢡꢶ ꢨꣁꢭ꣄ꢙꢶꢫꢵꢡ꣄ꢡꢾ ..ꢂꢡ꣄ꢡꣁ ꢦꣂꢜꢸꢪ꣄ ꢔꢾꢞ꣄ꢞꣁ ꢂꢮ꣄ꢞ꣄ꢬꢾꢱ꣄ ꢪꢾꢥꢵ.. ꢃꢦꢬꢿꢰꢥ꣄ ꢒꢾꢬꢛ꣄ꢙꢵꢬꢵꢡ꣄ꢡꢾ ꢪꢾꢥꢵ ꣎

ꢣꢵꢱ꣄: ꢒꢵꢪ꣄ ꢒꢾꢥ꣄ꢥꢵꢡ꣄ꢡꢒ꣄ ꢨꢶꢱꢶꢬꢴꢶꢫꢾꢡ꣄ ꢄꢱꣂꢱ꣄ ꢦꣂꢜꢸꢪ꣄ ꢔꢾꢞ꣄ꢞꣁ, ꢦꢵꢜꢸꢬ꣄ ꢔꢾꢞ꣄ꢞꣁ ꢪꢾꢥꢶ ꢂꢮꢫ꣄.. ꢃꢖ꣄ꢔꢸꢒ꣄ ꢒꢵꢪ꣄ ꢥꢴꢷꢡ꣄ꢡꢾꢥꢸ ꢂꢩ꣄ꢫꢵꢱꢸꢥ꣄ ꢒꢾꢬ꣄ꢥꣁ.. ꢡꢾꢮꢿꢳꣂꢱ꣄ ꢃꢖ꣄ꢔꢸ ꢨꢬꣁꢒꢥ꣄ ꢢꣁꢮ꣄ꢭꢸꢮꢵꢫꢶ.. ꢥꢴꢷ ꢪꢾꢥꢾꢡ꣄ ꢲꣁꢒꢡꢸ ꢮꢿꢱꢸꢥ꣄ ꢱꢾꢬꣁ ꢂꢪꢶꢫꢶ ꢒꢾꢰ꣄ꢜꢪ꣄ ꢦꣁꢳ꣄ꢳꢿꢡ꣄ ꢬꢴꢥꣁ ꢱꢿꢡ꣄ꢡꢿꢱ꣄.. ꢒꣂꢜ꣄ ꢯꢿ?
ꢂꢖ꣄ꢔꢸꢥ꣄ ꢂꢮ꣄ꢬꢶꢥꢶꢫꢷ ꢒꢵꢪ꣄ꢒꢾꢡ꣄ꢡꢶꢥꢸ?

ꢆꢰꢵ: ꢂꢡ꣄ꢡꢾꢖ꣄ꢔꢸꢜ꣄ ꢂꢮ꣄ꢥꢵ .. ꢂꢮꢸꢖ꣄ꢔꣁ ꢪꢾꢥ꣄ꢡꢶꢒꢶ..

ꢣꢵꢱ꣄: ꢗꣁꢒꢜ꣄ ꢒꢵꢪ꣄ ! ꢲꢶꢣ꣄ꢣꢶꢪ꣄ ꢡꢷ ꢒꢳꣀꢭꢶꢱ꣄ꢥꢵ. ꢂꢖ꣄ꢔꢸꢥ꣄ ꢢꢾꢮ꣄ꢜ ꢱꢪꢵꢥ꣄ ꢮꢶꢒ꣄ꢒꢡ꣄ꢡꢾꢬ꣄ ꢡꣁꢒꣁ  ꢒꢳꢵꢫ꣄ꢪꢾꢥꢶ ꢪꢷ ꢲꢮ꣄ꢜꢾꢡ꣄ꢡꢾ..ꢱꣁꢥ꣄ꢡꣂꢰ꣄ ꣎ ꢯꢿꢡ꣄ꢡꢾꢫꢾ ꢢꣁꢮ꣄ꢭꢶ ꢱꣁꢥ꣄ꢡꣂꢰ꣄ꢒꢥ꣄ ꢣꢶꢥ꣄ꢥꢸ ꢔꢪ꣄ꢞꢡ꣄ꢡꢒ꣄ ꢮꢵꢜ꣄ ꢮꢾꢒ꣄ꢒꢸꢥꣁ .. ꢡꢾꢒꣁ ꢌꢒꣁ ꢱꢷꢡꢶ ꢒꢾꢬꢡ꣄ꢡꢾꢫꢾ ꢂꢱ꣄ꢒꢶ ꢄꢱꣂꢱ꣄ ꢬꣁꢮ꣄ꢮ ꢪꢴꢾꢣ꣄ꢣꢶ ꢮꢶꢣ꣄ꢣꢵꢬꢸꢪ꣄ ꢙꢮꢫ꣄ꢫꢵꢫ꣄ ꣎

ꢆꢰꢵ: ꢒꢵꢪ꣄ꢒꢾꢡ꣄ꢡꢶꢥ꣄ ꢪꢾꢥꢡ꣄ꢡꢾ ꢭꢴꢾꢒ꣄ꢒꢵꢒ꣄ ꢂꢱ꣄ꢒꢶ ꢒꢵꢪꢸꢥ꣄ ꢡꢾꢒꣂꢱ꣄ ꢒꢾꢬꢞ꣄ꢠꣁ ꢪꢾꢥ꣄ꢡꢶ ꢪꢷ ꢨꢶꢱꢶ ꢲꣁꢣꢶꢱꢶ.. ꢪꢷ ꢡꢸꢖ꣄ꢒꣁ ꢒꢾꢬꢶ ꢣꢿꢡ꣄ꢡꢾ ꢒꢵꢪꢸꢥ꣄ ꢪꢾꢳ꣄ꢳꣁ .. ꢡꢾꢥꣁ ꢡꢸꢥ꣄ꢣꢾ ꢱꢾꢬꣁ ꢮꢡ꣄ꢡꣁ ꢒꢾꢬꢾꢡ꣄ ꢪꢾꢳ꣄ꢳꣁ ꢪꣁꢒꣁ ꢬꢵꢒ꣄ ꢂꢮꢥ꣄ ꢥꢶꢒꢶꢳ꣄ꢞꢶꢫꣁ.. ꢲꣁꢫꢾꢡ꣄ ꢡꢾꢭ꣄ꢡꢾꢒꣁ ꢪꢷꢱ꣄ꢥ ꢒꢵꢬꢠꣁ ꢪꢾꢥꢶ ꢪꣁꢒꣁ ꢂꢡ꣄ꢡꣂꢱ꣄ ꢒꢳꢵꢬꢱ꣄꣎  ꢡꢿꢥꢴꢵꢡ꣄ꢡꢒ꣄ ꢂꢪ꣄ꢒꣁ ꢱꢿꢡ꣄ꢡꢾ ꢮꢬ꣄ꢪꢵꢥꢸꢒ꣄ ꢒꢵꢪ꣄ꢒꢾꢡ꣄ꢡꢶꢥ꣄ ꢮꢿꢱ꣄ ꢥꢴꢷ ꢪꢾꢥꢶ ꢡꢸꢪꢶ ꢬꢿꢞꢶꢫꣁ ꢮꢶꢒ꣄ꢒꢾꢫꢾꢪꣁ ꢬꢷ ꢒꢳꢫ꣄ꢫꣁ ꣎ ꢄꢱꣂꢱ꣄ ꢏꢠ꣄ꢜꢾ ꢮꢶꢒ꣄ꢒꢶꢭꢿꢡ꣄ ꢬꢴꢶꢫꢾꢡꢶ ꢙꢶꢡ꣄ꢬꢮ꣄ ꢒꢵꢫ꣄ ꢲꣂꢫ꣄  ꢪꢾꢥꢡ꣄ꢡꢫꢷ ꢪꣁꢒꣁ ꢂꢥ꣄ꢣꢶꢫꣁ .. ꢒꢵꢪ꣄ ꢒꢾꢡ꣄ꢡꢶꢥꢸꢒ꣄ ꢢꣁꢮ꣄ꢭꢶꢫꢾ ꢲꢵꢭ꣄ ꢮꢶꢬ꣄ꢡꢵꢒ꣄ ꢮꢿꢱꢹꢱ꣄ ꢲꣁꢫꢾꢱ꣄..ꢒꢵꢭ꣄ ꢬꢵꢡ꣄ ꢂꢱ꣄ꢒꣁ ꢲꣂꢖ꣄ꢔꢹꢱ꣄ ꢂꢮꢾꢥꢶ ..ꢌꢭ꣄ꢡꢿꢱ꣄ ꢫꣂꢗꢥꣁ꣎

ꢣꢵꢱ꣄: ꢪꢾꢫ꣄ ꢂꢡ꣄ꢡꣁ ꢦꢫ꣄ꢥꢾꢡ꣄ ꢬꣁꢮ꣄ꢮ ꢥꢶꢛ꣄ꢙꢶ ꢲꢹꢜ꣄ꢔꢵ..

ꢆꢰꢵ: ꢣꣁꢱ꣄ꢒꣁ ꢲꣁꢭ꣄ꢭꣁ ꢒꢵꢪꢸꢥ꣄ ꢯꢿ .. ꢥꢶꢛ꣄ꢙꢶꢭꢿꢬꢴꢶꢫꢾꢡ꣄ ꢱꢾꢬ꣄ꢒ꣄ꢒꣁ ꢂꢮꢫ꣄ꢒꢷ .. ꢂꢡ꣄ꢡꢾꢖ꣄ꢔꢸꢜ꣄ ꢪꢷꢱ꣄ ꢍ  ꢕꣁꢪ꣄ꢪꢵꢒ꣄ ꢒꢵꢪ꣄ꢒꢾꢡ꣄ꢡꢶꢥ꣄ !

             ꢱꢸꢩꢪ꣄ (ꢪꢸꢱꢾꢱ꣄)  The End.

Short Story By Thirubuvanam Sri M.S.Ramani.
Posted by O.S.Subramanian.
 subramanian.obula@gmail.com

Those who want a copy of the whole story may send email to me.