Kaamkettin காம்கெத்தின் a short story by M.S.Ramani. (continued.)

Kaamkettin  ꢒꢵꢪ꣄ꢒꢾꢡ꣄ꢡꢶꢥ꣄ By M.S.Ramani. (4)

ꢣꢵꢱ꣄:ꢒꢵꢪ꣄ ꢒꢾꢡ꣄ꢡꢶꢥꢵ !  ꢪꢷ ꢡꣁꢬꢾ ꢱꢶꢖ꣄ꢔꢡꢶ ꢲꣁꢫ꣄ꢬꢴꢵꢫ꣄ ꢪꢾꢥ꣄ꢡꢶ ꢒꢵꢦꢶ, ꢥꢒꢭ꣄ꢦꢵꢥ꣄ ꢂꢱ꣄ꢒꢶ ꢂꢥꢶꢣꢿꢬꢾꢱꢶ ꣎

ꢆꢰꢵ: ꢲꣀꢮꢵ ! ꢒꢵꢪ꣄ ꢒꢾꢬꢡ꣄ꢡꢒ꣄ ꢂꢮꢶꢡ꣄ꢡꢾꢥꣁ ꢪꢾꢥꢶ ꢱꢖ꣄ꢔꢸꢥꣁ ꢯꢿꢡ꣄ꢡꢿꢱ꣄ꢥꢵ?

ꢒꢵꢪ꣄ꢒꢾꢡ꣄ꢡꢶꢥ꣄: ꢪꣁꢒ꣄ ꢒꣂꢜ꣄ ꢱꢖ꣄ꢔꢡ꣄ꢡꢒ꣄ ꢣꢶꢫꢵꢱ꣄ ꢨꢾꢫ꣄? ꢂꢱ꣄ꢒꢶ ꢡꢾꢥꢹꢱ꣄ ꢪꢾꢭ꣄ꢭꢶ ꢡꢾꢥꢹꢱ꣄ ꢒꢾꢬꢬꢵꢱꢶ!

ꢆꢰꢵ: ꢡꣁꢒꣁ ꢒꢵꢪ꣄ ꢒꢾꢬꢡ꣄ꢡꢒ꣄ ꢪꢾꢥꢶ ꢨꣁꢮꢾꢡꢶ.. ꢡꢹ ꢨꢶꢱꢶꢭ꣄ꢞꢶ, ꢂꢪ꣄ꢒꣁ ꢒꢵꢪ꣄ ꢓꢜ꣄ꢜꢶ ꢙꢿꢞꢫ꣄ ꢱꣁꢒꢥ꣄ ꢯꢿꢥꢵ !

ꢒꢵꢪ꣄ꢒꢾꢡ꣄ꢡꢶꢥ꣄: ꢬꢵꢒ꣄ ꢂꢮꢳ꣄ꢳꢸꢖ꣄ꢔꢥ꣄ ꢨꢾꢫ꣄ ..ꢒꢳꢵꢥꢵꢡ꣄ꢡꢒ꣄ ꢨꢶꢱꢫ꣄ꢫꣁ.. ꢱꢪ꣄ꢨꢸꢳꣁ .. ꢄꢒ꣄ꢒꣁ ꢪꢾꢥꢶ..

ꢣꢵꢱ꣄: ꢒꢵꢫ꣄  ! ꢍꢜꢵ..ꢮꢶ, ꢡꣁꢒꣁ ꢪꣁꢥ꣄ꢥꢸ ꢭꢫꢾ ꢤꢵꢥꢸꢒ꣄ ꢂꢱ꣄ꢒꢶ ꢒꢾꢬꢡ꣄ꢡꢾ ꢪꢾꢥꢶ ꢲꢮ꣄ꢜꢥ꣄ꢒꢷ? ꢒꢵꢪ꣄ꢒꢾꢡ꣄ꢡꢶꢥꢒ꣄꣄ ꢨꣁꢮ꣄ꢬꢾ  ꢱꢮ꣄ꢒꢵꢱ꣄ ꢪꣁꢬ꣄ ꢙꣁꢮꢳ꣄ ꢏꢠ꣄ꢜꢾ ꢮꢡ꣄ꢡꣁ ꢱꢖ꣄ꢔꢶꢱ꣄ꢱꢷ?

ꢆꢰꢵ: ꢍ ꢱꢮꣂ .. ꢨꣁꢮꢶ ꢲꣁꢫ꣄ꢫꢶꢬꢡ꣄ꢡꢾ .. ꢡꢾꢒꣁ ꢮꢾꢣꢸꢬ꣄ ꢢꣁꢮ꣄ꢭꢶ ꢂꢪꢶ ꢪꢭ꣄ꢭꢡ꣄ꢡꢾ ꢥꢴꢵ.. ꢂꢪ꣄ꢒꣁ ꢒꢸꢬ꣄ꢗꢶ ꢡꢾꢥꣁ ꢒꢵꢫ꣄ ꢲꢮ꣄ꢜꢫ꣄?

ꢍ ꢱꢵꢮꢵ, ꢡꢹ ꢱꢪ꣄ꢨꢸꢳꣁ ꢄꢒ꣄ꢒꣁ ꢪꢔꢬꢶꢡ꣄ꢡꢾ?

ꢒꢵꢪ꣄ꢒꢾꢡ꣄ꢡꢶꢥ꣄: ꢙꢾꢪ꣄ꢨꢸꢖ꣄ꢕꢿꢬ꣄ ꢒꢵꢪ꣄ ꢒꢾꢬꢡ꣄ꢡꢾ ꢮꢿꢳꣁ ꢢꢷꢥ꣄ꢱꣂ ꢬꢸꢦꢵꢫ꣄ ꢣꢶꢫꢵꢱꢶ.. ꢧꢭ꣄ꢗꢵꢣꢸꢒ꣄꣄ ꢓꢸꢪ꣄ꢨꢵꢖ꣄ ꢕꢿꢬ꣄ ꢢꢶꢥ꣄ꢥꢣ꣄ꢣꢸ ꢱꣂꢬꢸꢦꢵꢫ꣄ ꢣꢶꢫꢵꢱ꣄ ..

ꢆꢰꢵ: ꢢꢷꢥ꣄ ꢱꣂꢬꢸꢮꢵꢫꢷꢱ꣄ ꢱꢪ꣄ꢨꢸꢳꣁ..

ꢣꢵꢱ꣄: ꢒꢵꢫ꣄ .. ꢥꢶꢒꣁ ꢥꢴꢷꢡ꣄ꢡꢒ꣄ ꢮꢡ꣄ꢡꣁ ꢒꢾꢬꢬꢶꢡ꣄ꢡꢫꢷ?

ꢆꢰꢵ: ꢇꢪ꣄ꢥꢵꢡ꣄ꢡꢒ꣄ ꢬꢴꢮꣂ .. ꢩꢵꢡ꣄ ꢲꢥ꣄ꢣꢡ꣄ꢡꢾꢬꢴꢷ ꢂꢱ꣄ꢒꢶ ꢒꢵꢪꢸꢥ꣄ ꢒꢾꢬ꣄ꢡꢫ꣄ꢥꢵ?

ꢣꢵꢱ꣄: ꢮꢿꢫ꣄.  ꢡꣁꢬꢾ ꢪꣁꢥ꣄ꢥꢸ ꢤꢵꢥꢸꢒ꣄ ꢂꢱ꣄ꢒꢶ ꢒꢿ꣄ꢬ꣄…

ꢆꢰꢵ: ꢙꢷ ꢒꢵꢪ꣄ ꢱꢵꢮꢵ..

ꢣꢵꢱ꣄: ꢲꣀ ꢂꢪ꣄ꢨꣂ.. ꢡꣁꢬꢾ ꢥꢵꢮ꣄ ꢒꢵꢫ꣄ꢫꢾ?

ꢒꢵꢪ꣄ꢒꢾꢡ꣄ꢡꢶꢥ꣄: ꢃꢰꢵ !

ꢣꢵꢱ꣄: ꢆꢰꢵ, ꢃꢰꢵ.. ꢣꢷ ꢥꢵꢮꢸꢥ꣄ ꢱꢾꢬ꣄ꢒ꣄ꢒꣁ ꢯꢿꢥꢵ !

ꢆꢰꢵ: ꢧꢸꢙ꣄ꢙꢵꢫ꣄ ꢮꢾꢒꣁ .. ꢕꢾꢞꢶ ꢲꣂꢬ꣄ꢡ꣄ꢡꢾ .. ꢒꢵꢪꢸꢒ꣄ ꢥꢶꢒꢸꢳꣁꢮꣁ.. (ꢩꢶꢡ꣄ꢡꢬ꣄ ꢙꢵꢱ꣄)

ꢣꢵꢱ꣄:  ꢪ꣄ꢪ꣄ ..ꢒꢵꢪ꣄ ꢒꢾꢡ꣄ꢡꢶꢥ꣄ ꢂꢮꢾ ꢮꢿꢳꣁ .. ꢪꣁꢒꣁ ꢥꣁꢮ꣄ꢮꣁ ꢒꢵꢪ꣄ ꢂꢮꢶ ꢤꢶꢒ꣄ꢒꢶꢭ꣄ꢞꢶꢫꣁ..   ꢒꢵꢦ꣄ꢦꢶ ꢡꢒꢡ꣄ꢡꢾ ꢒꢵꢪ꣄ .. ꢒꢵꢦ꣄ꢦꢶ ꢒꢾꢬꢶ ꢒꢵꢪ꣄ꢒꢾꢡ꣄ꢡꢶꢥꢸꢒ꣄ ꢣꢿꢡ꣄ꢡꢾ ꢒꢵꢪ꣄ .. ꢂꢖ꣄ꢔꢸꢥ꣄ ꢪꢷ ꢒꢵꢫ꣄ ꢒꢵꢫ꣄ ꢒꢾꢬ꣄ꢥꣁ ꢯꢿꢫꢷ?

ꢃꢰꢵ: ꢣꢣꢵ !

ꢣꢵꢱ꣄: ꢒꢵꢫꢪ꣄ꢨꣁ ?

ꢃꢰꢵ: ꢲꢥ꣄ꢥꢮ꣄ ꢣꢿꢞ꣄ ꢱꣂꢬꢸꢮꢵꢫ꣄ ꢪꢸꢭ꣄ꢭꣁ ꢦꢫꢾꢲꣂꢱꢸ, ꢂꢥ꣄ꢣꢾ ꢂꢪ꣄ꢨꣁ ꢃꢱ꣄ꢦꢡ꣄ꢡꢶꢬꢶꢪ꣄ ꢯꢿꢡ꣄ꢡꢾ ..

ꢣꢵꢱ꣄: ꢡꢶꢬꢾꢱ꣄ ꢙꢵ .. ꢂꢮꢶ ꢒꢵꢪꢹꢱ꣄  ꢲꢵꢡ꣄ ꢤꢾꢬ꣄ꢬꢶꢥꢶ ..ꢲꢥ꣄ꢥꢮ꣄ꢒꢷ ! ꢮꢷꢳ꣄ꢜꢵꢒ꣄ ꢓꢳ꣄ꢳꢸꢮꢵꢫꢶ ꣎

                       ꢂꢖ꣄ꢔꢸꢥ꣄ ꢂꢮꢫꢶ (To be continued)

Kaamkettin  ꢒꢵꢪ꣄ꢒꢾꢡ꣄ꢡꢶꢥ꣄ By M.S.Ramani. (5)

ꢣꢾꢒ꣄ꢒꢶꢥꢶ - ꣓

(ꢦꢵꢡ꣄ꢬꢵꢥ꣄:  ꢣꢵꢱ꣄,  ꢆꢰꢵ, ꢃꢰꢵ)

ꢣꢵꢱ꣄: ꢒꢵꢫ꣄ ! ꢂꢖ꣄ꢔꢸꢥ꣄ ꢒꣁꢥ꣄ꢥꢶ ꢲꣁꢫ꣄ꢬꢴꢵꢥꢵ ꢱꣂꢥ꣄ ꢯꢿ…

ꢪꣁꢒꣁ ꢕꢾꢞꢶ ꢲꣂꢬ꣄ꢡ꣄ꢡꢾ ꢥꢴꢵꢫꢷ !ꢒꣂꢜ꣄ ꢯꢿ ꢡꢾꢥꣁ  ꢃꢰꢵ..

ꢆꢰꢵ: ꢪꢷ ꢂꢡ꣄ꢡꣂꢱ꣄ ꢲꢸꢜꢶꢡ꣄ꢡꢾ ! ꢒꣂꢜ꣄ ꢯꢿ .. ꢡꢾꢥꣁ ꢂꢖ꣄ꢔꢸꢥ꣄ ꢂꢮ꣄ꢬꢴꢵꢥꢵ ꢱꣁꢒꢥ꣄ ꢯꢿꢥꢵ !

ꢣꢵꢱ꣄: ꢱꢾꢬ꣄ꢒ꣄ꢒꢱ꣄.  ꢪꢷ ꢜꢶꢦꢥ꣄ ꢒꢾꢬꢶ ꢲꣁꢫ꣄ꢫꢶꢬ꣄ꢬꢴꢵꢫ꣄ ꢪꢾꢭ꣄ꢭꢿꢡ꣄ ꢯꢿ.. ꢡꢾꢒꢸꢬ꣄ꢗꢷꢱ꣄ ꢕꣁꢪ꣄ꢪꣁ ꢏꢠ꣄ꢡꢾ ꢪꢴꣁꢜ꣄ꢜꢵꢭ꣄ꢥꢸ ꢬꢴꢥꣁ ꢪꢾꢥꢬꢵꢡ꣄ꢡꢾ .. ꢡꢾꢥꢸ ꢬꢴꢶꢫꢾꢡ꣄, ꢡꢹ ꢄꢒ꣄ꢒꣁ ꢕꢾꢞꢶ ꢡꢳꢶ ꢲꢸꢜꢡ꣄ꢡꢒ꣄ ꢪꢸꢱꣀꢒꢷ? ꢕꢾꢠ꣄ꢜꣁ ꢄꢒ꣄ꢒꣁ? ꢃꢜ꣄ꢥꢴꢣ꣄ꢣꢸ ꣎

(ꢃꢰꢵ ꢂꢮꢱ꣄)

ꢃꢰꢵ: ꢨꢾꢫ꣄.. ꢲꢶꢥ꣄ꢣꣁ ꢬꣁꢮ꣄ꢮꣁ ꢕꢾꢞꢶ ꢲꣁꢫ꣄ꢫꣁ..

ꢆꢰꢵ:  ꢍꢜꢵꢮꢶ .. ꢄꢒ꣄ꢒꣁ ꢕꢾꢞꢶ  ꢡꢳꢶ ꢂꢮꢬꢶꢱ꣄ꢥꢵ .. ꢒꢵꢫ꣄ ꢪꢾꢥꢶ ꢲꢮ꣄ꢜꢶꢭ꣄ꢬꢶꢡ꣄ꢡꢾ?

ꢃꢰꢵ: ꢂꢡ꣄ꢡꢾꢖ꣄ꢔꢸꢜ꣄ ꢱꢾꢠꢪ꣄ ꢂꢮ꣄ꢞꢸꢱ꣄ ꢨꢾꢫ꣄..

ꢆꢰꢵ: ꢂꢡ꣄ꢡꣁ ꢂꢮꢾꢫꢾꢒꣁ ꢱꢖ꣄ꢔꢶ… ꢡꢾꢥꢸ ꢒꢵꢪꢸ ꢙꢵꢡ꣄ꢡꢒ꣄ ꢕꢾꢞꢶ ꢲꣂꢬꢱꢶ … ꢡꢹ ꢂꢡ꣄ꢡꢾꢖ꣄ꢔꢸꢜ꣄ ꢗꢸꢭ꣄ꢭꣁ ꢦꢾꢮ꣄ꢜꢶ ꢓꣁꢨ꣄ꢨꢵꢒ꣄ ꢲꣁꢮꢞꢶ ꢣꢿꢡ꣄ꢡꢾ?

ꢃꢰꢵ: ꢪꢷ ꢦꢫꢥꢾꢡ꣄ ꢲꣁꢫꢾꢡ꣄ꢡꢾꢬ꣄ ꢣꢣꢵꢥꢸ ꢃꢧꢷꢱꢸꢒꢹꢱ꣄ ꢭꢿꢙ꣄ꢙꢶ ꢣꢷꢞꢶ ꢂꢮ꣄ꢞꢸꢱ꣄…

ꢆꢰꢵ: ꢡꢿ ꢲꣁꢫꢾꢡ꣄ ꢡꢾꢖ꣄ꢒꣁ ꢂꢡ꣄ꢡꣁ ꢱꢸꢒ꣄ꢒꢶꢭꢿꢡ꣄ ꢙꢵ ꢪꢾꢥꢬꢶꢡ꣄ꢡꢾꢫꢷ?

ꢣꢵꢱ꣄: ꢲꣀꢮꢪ꣄ꢨꣂ .. ꢡꢹ ꢒꣁꢥ꣄ꢥꢶ ꢃꢧꢷꢱꢸꢒ꣄ꢒꢷ ꢂꢮ꣄ꢞꢸꢖ꣄ꢔꣁ.. ꢡꢿꢜ꣄ ꢯꢿꢡ꣄ꢡꢾꢥꢸ ꢱꢶꢫꢾꢡ꣄ ꢗꢵꢬ꣄ꢣꢶꢥꢸꢱꢸꢥ꣄ ꢮꢡ꣄ꢡꣁ ꢒꢾꢬꢥ꣄ ꢥꢶꢒꢸꢳ꣄ꢳꢥ꣄..ꢱꢾꢬ꣄ꢒ꣄ꢒꢱ꣄ … ꢡꣁꢒꣁ ꢒꢒꣁ ꢄꢒ꣄ꢒꢾ ꢕꢾꢞꢶ ꢲꣁꢫꢡ꣄ꢡꢾ?

ꢃꢰꢵ: ꢱꢾꢙ꣄ꢙꢾ ꢕꣁꢪ꣄ꢪꢵ ꢨꢾꢫ꣄ꢒꢸ ꢃꢖ꣄ꢔꢸ ꢱꢾꢬ꣄ꢒ꣄ꢒ ꢥꢴꢷꢡ꣄ꢡꢒ꣄ ꢱꣁꢳꣁꢨ꣄ꢧꢵꢬ꣄ ꢂꢱ꣄ꢦꢡ꣄ꢡꢶꢬꢶꢒ꣄ ꢨꣁꢭ꣄ꢙꢷꢬꢵꢡ꣄ꢡꢾ  ..ꢂꢥ꣄ꢣꢾ ꢨꢾꢫ꣄ ꢡꢿꢜ꣄ ꢒꢵꢪ꣄ ꢒꢾꢭ꣄ꢭꢿꢡ꣄ ꢯꢿꢡ꣄ꢡꢾ .. ꢡꢾꢥꣁ ꢪꢾꢳ꣄ꢳꣁ ꢂꢱ꣄ꢦꢡ꣄ꢡꢶꢬꢶꢒ꣄ ꢙꢿꢞꢶꢫꢲꢵꢭꢸ, ꢡꢿꢜ꣄ ꢙꢷ ꢒꢵꢪ꣄ ꢒꢾꢬꢶ ꢲꣁꢮꢜ꣄ꢜꢶ ꢍꢜ꣄ ꢂꢮꢬꢶꢡ꣄ꢡꢾ..

ꢆꢰꢵ: ꢍꢜ꣄ ꢒꢵꢪ꣄ ꢒꢾꢬꢶ ꢲꣁꢮꢜ꣄ꢜꢶ ꢡꢿꢜ꣄ ꢙꢷꢬꢴꢶꢫꢾꢡ꣄ ꢒꢵꢫ꣄?

ꢃꢰꢵ: ꢡꢾꢥꢸ ꢢꢶꢥ꣄ꢥꢣ꣄ꢣꢸ ꢱꣂ ꢬꢸꢦꢵꢫ꣄ ꢱꢪ꣄ꢨꢸꢳꣁ ꢣꢿꢬꢵꢡ꣄ꢡꢾ .. ꢡꢿꢥꢴꢵꢡ꣄ꢡꢒꢸ ꢍꢜ꣄ ꢡꢸꢪꢶ ꢲꢸꢞꢾꢡ꣄ꢡꢾꢬ꣄ ꢡꢸꢖ꣄ꢒꣁ ꢒꢵꢦ꣄ꢦꢶ ꢒꢾꢬꢶ ꢣꢶꢫꢾꢡꢷꢱ꣄ ꢪꣁꢬ꣄ ꢒꢵꢪ꣄ ꢲꣂꢫ꣄ .. ꢡꢸꢪꢶ ꢲꢸꢞꢡ꣄ꢡꢒꢹꢱ꣄ ꢃꢜ꣄ ꢕꢾꢠ꣄ꢜꣁ ꢲꣁꢭ꣄ꢭꢾ ꢲꣁꢫ꣄ꢫꢵꢬꢱꢶ, ꢡꢾꢒ ꢧꢭ꣄ꢗꢵꢡꢸ ꢪꢷ ꢡꢿꢜ꣄ ꢙꢵꢡ꣄ꢡꢒ꣄ ꢱꢾꢬ꣄ꢒ꣄ꢒꣁ ꢂꢮꢫ꣄ꢒꢷ?  ꢱꢾꢙ꣄ꢙꢾ ꢕꣁꢪ꣄ꢪꢵ ꢣꢣꢵ ꢱꢵꢣꢸꢥꢴꢣ꣄ꢣꢸ ꢕꢾꢠ꣄ꢜꢵꢒꢹꢱ꣄ ꢂꢖ꣄ꢔꢶꢞꢶ ꢲꢸꢜ꣄ꢜꢸꢒꢥ꣄…

ꢣꢵꢱ꣄: ꢎꢒꢶꢭꢿ .. ꢡꣁꢒꣁ ꢂꢮ꣄ꢬꢾ ꢪꣁꢣꢸꢬꢳꢶꢦ꣄ꢦꢥ꣄ ꢒꣁꢖ꣄ꢒꢶꢥꢵꢒꢹꢱ꣄ ꢂꢮ꣄ꢥꢵ .. ꢃꢰꢵ, ꢱꢾꢙ꣄ꢙꢾ ꢕꣁꢪ꣄ꢪꢵ ꢨꢾꢫ꣄ꢒ꣄ ꢒꢵꢫ꣄ ꢲꣁꢫ꣄ꢬꢡ꣄ꢡꢾ?

ꢃꢰꢵ: ꢲꢿꢪ꣄ꢪꢸ ꢣꢸꢮ꣄ꢥꣁ ꢪꢾꢥꢵ..

ꢣꢵꢱ꣄: ꢱꢾꢬ꣄ꢒ꣄ꢒꣁ ! ꢡꢹ ꢙꢵ .. ꢥꢶꢱ꣄ꢡꣁ ꢒꢵꢦ꣄ꢦꢶꢡꢷ ꢒꢾꢬꢶ ꢲꣁꢮꢵꢜ꣄ꢙꢵ.. ꢦꢷꢡꢶ ꢙꢮꢸꢱ꣄

(ꢃꢰꢵ ꢩꢶꢡ꣄ꢡꢬ꣄ ꢙꢵꢱ꣄)

        ꢂꢖ꣄ꢔꢸꢥꢮꢫ꣄ ꣎   To be continued.

Kaamkettin  ꢒꢵꢪ꣄ꢒꢾꢡ꣄ꢡꢶꢥ꣄ By M.S.Ramani. (6)

ꢣꢵꢱ꣄: ꢡꢹ ꢓꣁꢨ꣄ꢨꢵꢒ꣄ ꢂꢱ꣄ꢦꢡ꣄ꢡꢶꢬꢶꢒ꣄ ꢙꢵꢡ꣄ꢡꢾ?

ꢆꢰꢵ:  ꢒꢒꣁ? ꢪꣁꢒꣁ ꢒꢵꢫ꣄ ꢲꣁꢫ꣄ꢫꣁ ꢂꢡ꣄ꢡꣁ?

ꢣꢵꢱ꣄: ꢱꢾꢙ꣄ꢙꢾ ꢕꣁꢪ꣄ꢪꢵ ꢨꢾꢫ꣄ ꢙꢷꢬꢵꢱ꣄ꢥꢵ ! ꢡꢾꢖ꣄ꢒꣁ ꢱꣁꢒꢥꢹꢱ꣄ ꢡꢹ ꢬꢴꢥꣁ ꢪꢾꢥ꣄ꢬꢶꢡ꣄ꢡꢾ.  ꢡꢾꢥꢸ  ꢏꢫ꣄ꢣꢦ꣄ꢦꢥ꣄ ꢮꢿꢱ꣄ ꢒꢾꢬꢾꢡ꣄ ꢡꢹ ꢒꢾꢬꢡ꣄ꢡ ꢥꣁꢒ꣄ꢒꣁꢫꢷ?  ꢗꣁꢒ꣄ꢒꢜ꣄ ꢲꢜ꣄ꢮꢥ꣄ ꢢꣁꢮ꣄ꢭꢿ … ꢒꢵꢪ꣄ ꢒꢾꢥ꣄ꢥꢵꢡ꣄ꢡꢒ꣄ ꢨꢶꢱꢶꢬꢴꢶꢫꢾꢡꢶ  … ꢄꢱꣂꢱ꣄  ꢲꢿꢪ꣄ꢪꢸ ꢣꢸꢮ꣄ꢥꣁ .. ꢦꢵꢫꢶꢛ꣄ꢣꢸꢮ꣄ꢥꣁ  ꢪꢾꢥꢶ ꢃꢖ꣄ꢔꢸ ꢂꢱ꣄ꢒꣁ ꢬꣂꢒ꣄ ꢂꢮ꣄ꢞꢫ꣄ !

(ꢃꢰꢵ ꢂꢮꢱ꣄)

ꢃꢰꢵ: ꢨꢾꢫ꣄ .. ꢗꢸꢭ꣄ꢭꣁ ꢭꢒꢞꢡ꣄ꢡꢒ꣄ ꢣꢶꢮꢬꢪ꣄ꢦꢥꢷꢱ꣄  ꢥꢴꢷ, ꢱꢾꢙ꣄ꢙꢶꢬꢿꢱ꣄ ꣎

ꢣꢵꢱ꣄: ꢚꢸꢒ꣄ꢒꢸ ꢗꣁꢒ꣄ꢒꢜ꣄ ꢒꢵꢪ꣄ !

ꢆꢰꢵ: ꢱꢾꢙ꣄ꢙꣁ ꢪꢾꢥꢶ ꢒꢵꢭꢹꢱ꣄ ꢱꢖ꣄ꢔꢶꢬꢴꢵꢡ꣄ꢡꢒ꣄ ꢒꢵꢫ꣄?

ꢃꢰꢵ: ꢪꢷ ꢱꢖ꣄ꢔꢸꢥꣁ ꢪꢾꢥꢷꢱ꣄  ꢲꣁꢣꢶꢡ꣄ꢡꢾ ..ꢡꢾꢒ ꢩꢶꢡ꣄ꢡꢬꢸꢪ꣄ ꢡꢸꢪꢶ ꢥꢶꢛ꣄ꢙꢶꢭ꣄ꢞꢶ ꢲꣁꢡꢵꢱ꣄ ꣎ ꢪꣁꢒꢒ꣄ꢒꢷ  ꢲꢮ꣄ꢜꢥ꣄ ꢙꢿꢞꢶꢫꣁ …

ꢆꢰꢵꢳ꣄  ꢪ꣄ꢪ꣄.. ꢒꢵꢪ꣄ ꢒꢾꢡ꣄ꢡꢶꢥ꣄ ꢢꣁꢮ꣄ꢭꢶꢫꢵꢱ꣄ ꢪꢾꢥꢶ ꢮꢡ꣄ꢡꣂꢱ꣄.. ꢬꣁꢮ꣄ꢮ ꢪꢾꢳ꣄ꢳꣁ ꢥꢶꢪ꣄ꢪꢳ꣄ ꢣꢾꢒ꣄ꢒꢵꢥꢶ ꣎

ꢣꢵꢱ꣄: ꢱꢾꢬ꣄ꢒ꣄ꢒꣁ … ꢪꢷ ꢮꢵꢜꢸꢪ꣄ ꢒꢵꢦ꣄ꢦꢶ ꢒꢾꢬ꣄ꢭꢶꢙꢮꢸꢱ꣄ ..ꢣꢷ ꢡꢾꢥꢸ ꢪꢶꢳꢶ ꢣꢸꢩꢵꢬꢶ ꢩꢵꢡ꣄ꢡꢷ ꢲꣁꢮꢞꢶ ꢢꣁꢮ꣄ꢥ꣄ꢒꢷ ? ꢥꢴꢷ, ꢄꢱꣂꢱ꣄ ꢱꢸꢒ꣄ꢒꢶꢭꢿ ꢙꢥꣁ ꢦꣁꢞꢫ꣄ꢒꢷ?

(ꢣꢵꢱ꣄ ꢥꢶꢒꢸꢳꢱ꣄) ꢂꢖ꣄ꢔꢸꢥ꣄ ꢂꢮꢫ꣄    (To be continued)