Sourashtra Vyakarana Vallari - By T.M.Ramarai. (continued)

(67) ஏ பா⁴ஷாம் நபும்ஸக லிங்கு³ம் த்³விதீயா விப⁴க்தி, ப்ரத²மா விப⁴க்தி ஸொகன் ஸேத்திஸானுகெ. (உ) அரே க்ருஷ்ணா ஸமித் க²ட்டின் நைமிஸாரண்யாகு ஜைனு க²ள்யாவி, ஏ வாக்யுனும் ஸமித் க²ட்டின் மெந்த ஸப்³து³ த்³விதீயா விப⁴க்தி ஹோஸு.
ஸமித் க2ட்டி ஏ ராணும் கொட்டி அப்³ப³னி, ஏ வாக்யாம், ஸமித் க²ட்டி மெனத்தெ ஸப்³து³ ப்ரத²மா விப⁴க்தி ஹோஸு. ஹாலிமு ப்ரத²மா விப⁴க்திக்கினி த்³விதீயா விப⁴க்திகு ரூபு பே⁴து³ன் ஜுண்ண. மெகி, அர்து பே⁴துன் ஸேத்தேஸி மெனி களைலுனொ.

(68) நபும்ஸகலிங்கு³ம் ஸம்போ³த⁴ன விப⁴க்தி ஜுண்ண. ஹாலிம் நபும்ஸக லிங்கு³ம் ஸாத் விப⁴க்தின் மெனி களைலுனொ. ப்ரதி வாசிம் (ப³த்³னவாசிம்) மெள்ளி ஸம்போ³த⁴ன விப4க்தி ஜுண்ண.

                  ப்ரதி வாக்யு வர்கு³ ஸம்பூர்ணு.

                        நிக்⁴ன வாசி வர்கு³

(69) நிக்⁴னவாசி மெந்த, விஸேஷண வாசி மென்னாவு. விஸேஷண வாசி மெந்த, வஸ்து கு³ண்ணுன் களட³த்திஸானுகெ. (உ) எனொ சொக்கட்³ மெனிகு. ஏ வாக்யாம் சொக்கட்³ மெநத்தேஸி நிக்⁴னவாசி. சொக்கட்³மெனஸ்தான்கெ மெனிகு கு³ண்ணு களட³ஸு.

(70) நிக்⁴ன வாசிமு கு³ண்ணுன் ஸப்³த³ ஸ்பர்ஷ ரூப ரஸ க³ந்து⁴ன் மெனத்திஸானு. ஏ பஞ்சூ விஷயானு ஹாலி ஏ பஞ்சூயெமொ ரீ:னு கு³ண்ணுன் க்³ரஹண கெர்லுன ஸேத்தெ. சொக்கடு³ தி⁴ல்லொ, ஸ்பர்ஷு லெந்த ஜன்ன ஸேத்தெ. வாசி = ஹுன்னொ, ஸிள்ளொ. ரூபுலெந்த ஜன்னஸேத்தெ = உஞ்சொ – கா²லு, பெஷாவ்-அக்ரொ, பள்டொ-ஜடொ³, ந:ன்னொ-மொ:ட்டொ. ரஸ கு³ண்ணு ஹாலி ஜன்ன ஸேத்தெ விஸேஷண வாசி = கு³ள்ளெ,திக்கெ, அம்ப³ட், கஸ்னி, கொடு³, திர்சென், கெ²ருடு³. க³ந்து⁴ ஹாலி ஜன்னொ ஸேத்தெ கு³ண வாசின் = வஸ்னொ, கா⁴னு, மிஸ்ரக³ந்து⁴ இத்யாதி. ஸங்க்²யா வாசின் மெள்ளி கு³ண வாசின் மென்னாவு, தீ ஜனொ, ஒஜனொ, ஸாத்யொ, தீ²ன்யொ – இத்யாதி³ன்.

(71) நிக்⁴ன வாசிகு லிங்கு³ விப⁴க்தி வசனுன் ஜுண்ண.

விஸேஷண ஸப்³து³ன்
ஹுஜாளு, களொ, நிளொ, ஹள்டு³னொ, பொ⁴வுளொ, சமல், உதொ³, லொ:வொ, குள்டொ, கபுல், பிங்க³ள் இத்யாதி³.

(72) நிக்4ந வாசிகு ஸ்தி²தின் தீ²ன்யொ. நிஜஸ்தி²தி, தரஸ்தி²தி, தமஸ்தி²தி ஏ தி²னூ ஸ்தி²தின் லெந்த தராதருன் கினி தாரா தம்யுன் ஜனாஸு. (உ) கா³யி தூ³ஸ்ஸொம்மரு ஸெளிபெ⁴ண்டு³ தூ³து பெ⁴ள்சொக்கடு³. எக்கிந்தெக லானி. ஸிவாக்கின் விஷ்ணு ப³ர இத்யாதி³.

               நிக்⁴ன வாசி ஸம்பூர்ணு.

(to be continued)